Últimas prazas nos cursos gratuítos de UGACOTA nos centros da Rede Eusumo

A Unión de Cooperativas de Traballo Asociado-Ugacota organiza cursos gratuítos dentro do marco da programación formativa da Rede Eusumo.

Levaranse a cabo dúas accións formativas nos Centros da Rede Eusumo da Fundación Terra de Trasancos (Narón, A Coruña) e da Caixa Rural Galega de Lugo.

CENTRO DA REDE EUSUMO NA FUNDACIÓN TERRA DE TRASANCOS – COOPERATIVA DO VAL
(Vilacornelle, s/n, Narón, A Coruña)
Obradoiro: COÑECENDO A MIÑA COOPERATIVA (Ver contidos)
Datas: 29 e 30 de outubro.
Horario: de 10:030 a 14:30hs.
Obxectivo: Revisar e actualizar os coñecementos cooperativos dos socios e socias. Lembrar que significa ser cooperativista. Dar a coñecer os recursos e ferramentas para mellorar o funcionamento da cooperativa.
Dirixido a: persoas socias de cooperativas

 

CENTRO DA REDE EUSUMO NA CAIXA RURAL GALEGA
(Praza Fonte dos Ranchos, 27, b, Lugo)
Obradoiro: PERSOAS QUE QUEREN EMPRENDER (Ver contidos)
Datas: do 5 ao 9 de Novembro
Horario: de 10:00 a 15:00hs.
Obxectivo: Achegar o modelo cooperativo á cidadanía. Mostrar as condicións e pasos a dar para emprender baixo a fórmula cooperativa. Contribuír a que estas persoas coñezan e valoren as cooperativas
Dirixido a: público en xeral.

Para máis información e inscricións nos obradoiros:

UGACOTA CORUÑA (Patane García Méndez)
Tf: 881 887 456 / 697 877 773
E-mail: patane@ugacota.coop
Toda a información na seguinte ligazón: http://ugacota.coop/rede-eusumo/ultimas-prazas-cursos-gratuitos-de-ugacota-nos-centros-da-rede-eusumo/

Coñecemos a Trespés

Desta vez, imos achegarnos ao proxecto cooperativo Trespés Soc. Coop. Galega. Non é a primeira vez que falamos de Trespés xa que é a cooperativa que está por tras dun fermoso proxecto que contribuímos a difundir: En todas as mans. Imos coñecer un pouco máis este equipo multidisciplinar que elixiu o cooperativismo como fórmula empresarial para levar a cabo os seus proxectos.

1. Cando e como nace o voso proxecto cooperativo?

Como en non poucas ocasións a idea deste proxecto xorde en conversas informais. Cada unha das persoas integrantes do grupo promotor viña desenvolvendo a súa actividade profesional no ámbito laboral por conta allea. A través das nosas actividades profesionais detectamos carencias e oportunidades nos sectores onde estabamos a traballar. Sobre todo, percibimos un parcelamento entre os diferentes ámbitos do coñecemento que centran o noso proxecto, social, ambiental e cultural. Ao tempo, coincidiamos na vontade e necesidade de dotármonos dunha estrutura propia que nos permitira desenvolver proxectos que cubriran esas carencias das que falabamos antes.

A partir desta premisa inicial, fomos perfilando a idea até lindar as marxes dun proxecto que ten como marco a construción social, cultural e medio ambiental. Achamos que é a través da produción, a xestión e a consultaría-asesoría o mellor xeito de intervir nestes sectores.

2. A que vos dedicades?

Trespés Soc. Coop. Galega ofrece unha visión integral e multidisciplinar baseada nunha ampla experiencia nos sectores social, cultural e ambiental.

Combinamos e complementamos os diferentes ámbitos de traballo aplicando unha perspectiva cualitativa e fomentando a participación cidadá mediante metodoloxías flexíbeis a cada contexto.

Así, traballamos na consultaría e asesoría; na produción de contidos como exposicións, audiovisuais, publicacións; na dinamización e desenvolvemento local; na educación e formación; e na investigación básica e aplicada.

3. Cantas persoas conforman a cooperativa?

Facemos parte 3 persoas socias, Paulo Jablonski, licenciado e doutor en Antropoloxía, Tania Martínez, licenciada en Bioloxía e Alberte Román, licenciado en Xeografía. Esta diversidade de perfís incorpora unha visión poliédrica aos nosos proxectos.

4. Cales son a filosofía e os valores da cooperativa?

A cooperativa ten por obxecto a prestación do traballo das persoas socias para a produción en común de bens e servizos para terceiros.

É obxecto social da nosa cooperativa ofrecer unha carta de servizos diversificada nos ámbitos do social, cultural e medio­ambiental que contribúan á mellora da sociedade. Apostamos polo espallamento dos principios e prácticas da economía social impulsando o modelo cooperativo, mediante o estímulo do auto­emprego.

En parte debido a esta motivación, levar ao plano laboral a transformación social, Trespés iniciou o procedemento para se transformar nunha cooperativa de iniciativa social sen fins lucrativos.

5. Cal é a vosa relación coa contorna local?

Cada unha das socias da cooperativa participa en diferentes movementos sociais na medida das súas afinidades, vontades e posibilidades. Cada unha ao seu xeito estamos presentes en asociacións polo consumo responsábel, asociacionismo cultural e político. Entendemos a participación social e o ámbito cooperativo como un continuo. Levamos o activismo á cooperativa e o cooperativismo ao activismo.

6. Que proxectos tedes para o futuro?

É vontade da cooperativa poder desenvolver por nós propios aqueles proxectos que achamos necesarios, en grande medida sermos unha cooperativa de iniciativa social vainos permitir avanzar nesta liña. Nesta altura, entre outros proxectos, estamos inmersos na produción dun documental centrado nos montes veciñais en mancomún, que se titula “En todas as mans”. Entendemos que o mundo do veciñal non está o suficientemente visibilizado na realidade social do país, sendo como é un elemento que caracteriza o 25 % do territorio galego. Nestes momentos estamos en fase de pre­produción, á procura de financiamento e planificando a gravación. Entre outras particularidades, “En todas as mans” é o primeiro documental galego en utilizar estratexias de  financiamento colaborativo.

Novas tecnoloxías e cooperativismo

Nas próximas semanas vaise desenvolver o seminario As novas tecnoloxías e cooperativismo: ferramentas que facilitan a súa aplicación.

Esta iniciativa da Rede Eusumo pretende mostrar unha visión xeral das ferramentas e servizos que poden facilitar a aplicación das novas tecnoloxías no cooperativismo.
Por outra parte, tamén se facilitará unha visión introdutoria ás aplicacións que permitan unha mellora da organización e as vantaxes de ter un espazo propio na rede.

Datas e lugares de realización:

  • 19 de marzo de 2012. Centro de Desenvolvemento Cooperativo Transfronteirizo de Verín
  • 21 de marzo de 2012. Centro de Desenvolvemento Cooperativo de Lugo
  • 22 de marzo de 2012. Centro de Desenvolvemento Cooperativo de Narón
  • 23 de marzo de 2012. Centro de Desenvolvemento Cooperativo de Razamonde

Para realizar a inscrición, podedes chamar aos teléfonos 986 020 899 ou 678 759 079 ou enviar un correo electrónico a teresa.rivas@ardoraformacion.com

Imaxe destacada: Ilco

Curso sobre cooperativismo

O próximo 28 de febreiro comeza un Curso de Formación en Cooperativismo para Estudantes e Titulados Universitarios. Este curso gratuíto enmárcase nun convenio de colaboración entre a Consellería de Traballo e Benestar da Xunta de Galicia, a Universidade de Santiago de Compostela e as asociacións de cooperativas: Agaca, Ugacota e Sinerxia.

Rematará o 25 de marzo e durará 42 h, distribuídas entre 19 h presenciais, 8 h de prácticas e 8 h de visitas e análise de experiencias reais.

A inscrición está aberta ata o 23 de febreiro de 2012 pero convén facelo canto antes xa que a admisión terá en conta, ademais do expediente académico, a orde de chegada. O número máximo de prazas será de 36 alumnos e alumnas.

Ao rematar o curso, realizarase a convocatoria pública de 3 contratos laborais dun ano de duración para a formación como técnicos no asesoramento e xestión de proxectos cooperativos. A asistencia con aproveitamento ao curso contará como mérito relevante no concurso.

Podedes ampliar a información na ficha descargable sobre o curso.

Imaxe destacada: Srbichara

UGACOTA oferta cursos gratuítos

Ugacota xa puxo en marcha as súas accións formativas para o período 2011-2012, dirixidas a persoas socias e asalariadas das cooperativas galegas. Aínda hai prazas dispoñibles para participar nalgúns dos cursos que darán comezo no mes de xaneiro de 2012!

A primeira quenda de cursos do contrato programa autonómico de Ugacota comezou no mes de novembro de 2011. Nesta convocatoria ofértanse 21 accións formativas  e máis de 500 plazas, nas modalidades de teleformación, formación a distancia e presencial. Comezarán en xaneiro as seguintes:

  • Márketing Operacional: Ferramenta de Futuro para o Crecemento das Vendas. Teleformación (65 h): 18 de xaneiro de 2012
  • OpenOffice 2.1 (básico). Teleformación (70 h): 18 de xaneiro de 2012
  • Xestión por Competencias. Teleformación (45 h): 18 de xaneiro de 2012
  • Comunicación Eficaz no Proceso de Negociación Empresarial. Distancia (50 h): 18 de xaneiro de 2012
  • Sistemas de Información Xeográfica Aplicado á Empresa. Presencial (35 h): 1º trimestre 2012

Para obter máis información ou inscribirte nestes cursos, podes acceder aquí.

No tocante á participación de Ugacota no Convenio estatal coa Fundación Tripartita asinado por COCETA, nesta convocatoria impartiranse 14 accións formativas; aínda hai prazas disponibles nos seguintes cursos:

  • Contratación Laboral. Teleformación. (60 h): xaneiro 2012
  • Retribucións Salariais, Cotizacións e Recadación. Teleformación (90 h): xaneiro 2012
  • Aplicacións Informáticas para Presentacións. Teleformación (30 h): xaneiro 2012
  • Sistema Operativo, Busca da Información: Internet/Intranet e Correo electrónico. Teleformación (30 h): xaneiro 2012
  • Aplicacións Informáticas de Tratamento de Textos. Teleformación (30 h): xaneiro 2012
  • Aplicacións Informáticas de Follas de Cálculo. Teleformación (50 h): xaneiro 2012
  • Marketing 2.0. Teleformación (90 h): xaneiro 2012
  • Manipulador de Alimentos. Teleformación (10 h): xaneiro 2012
  • Xestión de Sistemas de Información. A distancia (128 h): xaneiro 2012
  • Deseño de Páxinas Web. Teleformación (60 h): xaneiro 2012

Se queres realizar a inscrición nalgún destes cursos, ou recibir máis información, podes enviar unha mensaxe que inclúa os teus datos (nome e apelidos, teléfono, e-mail de contacto e nome da cooperativa) a patane@ugacota.org, ou chamar aos teléfonos 881 887 456 e 697 877 773.

Imaxe destacada: danzo08

 
Creative Commons License Últimas prazas nos cursos gratuítos de UGACOTA nos centros da Rede Eusumo is licensed by coopMunicando under a Creative Commons Attribution-Noncommercial-Share Alike 3.0 United States License.