Premios á Cooperación 2012

O Consello Galego de Cooperativas vén de  convocar os “Premios á Cooperación 2012”. Podedes presentarvos baixo as seguintes modalidades:

  • Premio aos valores cooperativos. Destínanse á cooperativa, entidade ou persoa que máis teña destacado no impulso dos valores cooperativos en Galicia.
  • Premio ao mellor proxecto cooperativo. Outórgase a un proxecto empresarial cooperativo de especial relevancia. Terase en conta o seu carácter innovador, a intercooperación e a repercusión no contorno, entre outros valores.
  • Premio á promoción do cooperativismo. Diríxense á persoa ou entidade que destacara especialmente no fomento do cooperativismo, tanto pola súa traxectoria como por actuacións de carácter puntual.

Cada premio ten unha dotación de 6.000,00 € e a entrega de premios farase o Día do Cooperativismo, o primeiro sábado do mes de xullo.

O prazo de presentación de solicitudes remata o 16 de maio de 2012. Podedes consultar as bases para o ano 2012 no DOG de 16 de abril.

Cartel gañador para o Ano Internacional do Cooperativismo

Hoxe imos mostrarvos un fermoso traballo realizado pola cooperativa valenciana Collage-no. Este proxecto gañou o 1º Premio do concurso de carteis do Ano Internacional das Cooperativas, outorgado pola Alianza Cooperativa Internacional.

Ao concurso presentáronse cooperativas de deseño e creación gráfica de todo o mundo con proxectos que expresaran os valores do movemento cooperativo no Ano Internacional.

collage-no

Cartel gañador

O deseño gañador de Collage-no non só mostra as virtudes cooperativas; tamén foi producido de forma cooperativa; cada artista deseñou unha sección diferente, utilizando diferentes técnicas nun anaco de papel dobrado en tres, sen poder ver o que a outra persoa creara. Ninguén sabía que aspecto global tería a proposta ata que se  despregou totalmente.

Esta proposta de ensamblaxe colectiva de imaxes baseouse nunha técnica chamada “cadáver exquisito”. Cada deseñador de Collage-no ilustrou un dos tres conceptos, elixindo libremente a técnica e os recursos dispoñibles: empresa, sustentabilidade e cooperación.

Podedes descargalo na páxina: 2012.coop

 

A web de COCETA para o Ano Internacional do cooperativismo

COCETA (a Confederación Española de Cooperativas de Traballo Asociado) acaba de poñer en marcha unha web das cooperativas de traballo con motivo do Ano Internacional do Cooperativismo das Nacións Unidas, 2012: www.spain2012.coop.

Como xa anunciamos hai uns meses, 2012 é un ano para celebrar o cooperativismo. Co fío da mensaxe do Ano Internacional do Cooperativismo das Nacións Unidas, “As empresas cooperativas axudan a construír un mundo mellor” estanse a desenvolver actividades de promoción, difusión e celebración do movemento cooperativo en todo o mundo.

Pois ben, todas estas actividades e eventos que se están a desenvolver tanto no ámbito estatal como en todo o mundo pódense ver na web desenvolvida por COCETA.

Nesta páxina podedes acceder aos sitios web temáticos e autonómicos sobre o Ano Internacional das Cooperativas 2012 e consultar unha visión xeral dos beneficios do cooperativismo para a sociedade. Na páxina inicial, podedes empregar a axenda para compartir con todo o mundo os eventos e actividades do cooperativismo no ano 2012. Ademais, está dispoñible unha serie de vídeos sobre cooperativismo e xogos interactivos para entreterse e, á vez aprender sobre o traballo en cooperativas.

Axudas 2012 de cooperativismo e economía social

Veñen de publicarse as ordes de axudas para as cooperativas e empresas de economía social de Galicia, da Consellaría de Traballo e Benestar para o ano 2012; podedes ler as ordes nas ligazóns que anexamos.

Convocadas axudas para o fomento do emprego en empresas de economía social e de promoción do cooperativismo para o ano 2012:
Orde do 31 de decembro de 2011 pola que se procede á convocatoria de axudas dos programas de fomento do emprego en empresas de economía social e de promoción do cooperativismo para o ano 2012.

Convocadas axudas para o fomento e a consolidación das asociacións de cooperativas e de sociedades laborais para o ano 2012:
Orde do 30 de decembro de 2011 pola que se modifican as bases reguladoras para a concesión de axudas para o fomento e consolidación das asociacións de cooperativas e de sociedades laborais e se procede á súa convocatoria para el año 2012.

Convocadas axudas aos concellos e outras entidades locais de Galicia para a realización de actividades de promoción e fomento do cooperativismo para o ano 2012:
Orde do 31 de decembro de 2011 pola que se establecen as bases reguladoras para a concesión de axudas aos concellos e outras entidades locais de Galicia para a realización de actividades de promoción e fomento do cooperativismo, e se procede a súa convocatoria para o ano 2012.

Imaxe destacada: Irum

Historias.coop

Stories.coop é a primeira campaña dixital global para difundir o cooperativismo a través da tradición de contar historias. O proxecto, posto en marcha pola Alianza Cooperativa Internacional (ACI) xunto co Instituto Europeo de Investigación de Cooperativas e Empresas Sociais, quere representar toda a diversidade do movemento cooperativo en calquera parte do mundo, atraendo as historias tanto de grandes como de pequenas cooperativas.

Stories.coop

As historias poderán ser contadas en diferentes formatos, empregando a palabra, imaxes ou vídeos. Stories.coop mostrará a gran diversidade de experiencias cooperativas e o profundo impacto positivo que xeran en millóns de persoas.

Co poder das palabras e o poder das imaxes poderemos conectarnos coas experiencias, as emocións e a esperanza que transmiten estas historias. Xa hai dez dispoñibles na páxina.

A participación é moi sinxela. Se tes algunha experiencia cooperativa, só tes que gravala, filmala, contala… e compartila. A túa podería ser unha das 366 reportaxes do día, unha por cada día do ano 2012, declarado pola ONU como ano internacional do cooperativismo.

Ademais, todas as historias serán compartidas en stories.coop, a primeira biblioteca dixital do mundo de historias cooperativas.

Agardamos que un proxecto do país figure proximamente neste gran proxecto web!

 
Creative Commons License Premios á Cooperación 2012 is licensed by coopMunicando under a Creative Commons Attribution-Noncommercial-Share Alike 3.0 United States License.