Slideshow shadow

A web de COCETA para o Ano Internacional do cooperativismo

COCETA (a Confederación Española de Cooperativas de Traballo Asociado) acaba de poñer en marcha unha web das cooperativas de traballo con motivo do Ano Internacional do Cooperativismo das Nacións Unidas, 2012: www.spain2012.coop.

Como xa anunciamos hai uns meses, 2012 é un ano para celebrar o cooperativismo. Co fío da mensaxe do Ano Internacional do Cooperativismo das Nacións Unidas, “As empresas cooperativas axudan a construír un mundo mellor” estanse a desenvolver actividades de promoción, difusión e celebración do movemento cooperativo en todo o mundo.

Pois ben, todas estas actividades e eventos que se están a desenvolver tanto no ámbito estatal como en todo o mundo pódense ver na web desenvolvida por COCETA.

Nesta páxina podedes acceder aos sitios web temáticos e autonómicos sobre o Ano Internacional das Cooperativas 2012 e consultar unha visión xeral dos beneficios do cooperativismo para a sociedade. Na páxina inicial, podedes empregar a axenda para compartir con todo o mundo os eventos e actividades do cooperativismo no ano 2012. Ademais, está dispoñible unha serie de vídeos sobre cooperativismo e xogos interactivos para entreterse e, á vez aprender sobre o traballo en cooperativas.

Novas tecnoloxías e cooperativismo

Nas próximas semanas vaise desenvolver o seminario As novas tecnoloxías e cooperativismo: ferramentas que facilitan a súa aplicación.

Esta iniciativa da Rede Eusumo pretende mostrar unha visión xeral das ferramentas e servizos que poden facilitar a aplicación das novas tecnoloxías no cooperativismo.
Por outra parte, tamén se facilitará unha visión introdutoria ás aplicacións que permitan unha mellora da organización e as vantaxes de ter un espazo propio na rede.

Datas e lugares de realización:

  • 19 de marzo de 2012. Centro de Desenvolvemento Cooperativo Transfronteirizo de Verín
  • 21 de marzo de 2012. Centro de Desenvolvemento Cooperativo de Lugo
  • 22 de marzo de 2012. Centro de Desenvolvemento Cooperativo de Narón
  • 23 de marzo de 2012. Centro de Desenvolvemento Cooperativo de Razamonde

Para realizar a inscrición, podedes chamar aos teléfonos 986 020 899 ou 678 759 079 ou enviar un correo electrónico a teresa.rivas@ardoraformacion.com

Imaxe destacada: Ilco

Encontro OFF Internacional Economía e Cultura

O IV Encontro Off vaise desenvolver os días 16 e o 17 de febreiro en Santiago de Compostela. Nel, a comunidade Off dá resposta, a xeito de espello, á celebración do Encontro Internacional de Economía e Cultura que nas mesmas datas terá lugar na Cidade da Cultura de Galicia.

Os encontros Off son unha proposta de acción directa no eido da programación cultural e a acción artística galega, que xorde de xeito colectivo integrando diferentes axentes procedentes das artes plásticas, as artes escénicas, o mundo editorial e o mundo audiovisual en Galicia.

Ao longo destas dúas xornadas estudarase a viabilidade doutras economías posibles, o uso de moedas alternativas ou a aplicación de fórmulas cooperativas no ámbito cultural. Ademais de coñecer experiencias e iniciativas doutros campos e outros contextos, dedicarase un tempo e un espazo para a presentación de proxectos, ideas, etc. aberto a todas as persoas que participen. Seguirase o encontro oficial (streaming) e ensaiarase, dunha forma lúdica, a viabilidade dun Fondo de Investimento Cooperativo.

O Encontro Off terá lugar en Baleiro, canle de produción, espazo anexo á Facultade de Filoloxía da USC. Podedes ver o programa completo e actualizado na wiki dos encontros Off.

 

Cursos do programa I+Coopera

Novembro 29, 2011 in cooperativismo, destacadas, Formación, Innovación, Uncategorized

Esta aberto o prazo de inscrición para dúas accións formativas do programa I+Coopera que comezarán proximamente:

A xestión da innovación segundo a Norma UNE 166002:2006 impartirase desde o 1 ata o 22 de de decembro.

O ciclo da vida dun proxecto de I+D+i impartirase desde o 9 de xaneiro ata o 2 de febreiro de 2012.

Estes cursos encádranse no bloque de accións formativas específicas en materia de I+D+i que leva a cabo o proxecto I+Coopera; este proxecto ten como obxectivo impulsar as accións de investigación, de desenvolvemento tecnolóxico e de innovación no seu do sector cooperativo. É unha iniciativa da Dirección Xeral de Relacións Laborais, da Consellería de Traballo e Benestar.

Cada curso conta con 40 horas lectivas que se impartirán na súa maior parte a través de formación en liña. Contará con dúas sesións presenciais (inicio e peche do curso) que representarán 8 horas do curso. Estas sesións presencias contarán con expertos pertencentes ao Sistema Galego de Innovación. Podedes consultar os contidos do curso na web de I+Coopera.

Pódese facer a inscrición directamente sobre a páxina web (hai que crear un usuario da web e cubrir o formulario para inscribirse) ou directamente no correo info@innovacioncooperativas.com.

Tamén está aberta a inscrición para outras accións formativas englobadas neste proxecto:

Coaching e innovación. Do 06/02/2012 ao 29/02/2012
As TIC como ferramentas de soporte á innovación. Do 08/03/2012 ao 29/03/2012

Imaxe destacada: mwookie

Nova presidencia en CICOPA

Novembro 25, 2011 in cooperativismo, Uncategorized

O mércores 16 de novembro, elixiuse o novo presidente do Comité Internacional das Cooperativas de Produción (CICOPA) na cidade mexicana de Cancún. Manuel Mariscal, o candidato presentado por COCETA (Confederación Española de Cooperativas de Traballo Asociado), foi elixido neste evento por unha ampla maioría.

A día de hoxe, CICOPA agrupa 57 organizacións de 39 países, que representan máis de 1.400.000 persoas asociadas a algunha cooperativa de traballo. Por outra parte, COCETA agrupa confederadamente a 17 organizacións territoriais autonómicas.

Manuel Mariscal é na actualidade o presidente da organización confederada de Andalucía (FAECTA), o vicepresidente de COCETA e o vicepresidente de CECOP-CICOPA-Europe.

tellado

Trnghosh

Mariscal destacou que “será un presidente que espera contar co apoio de todas e cada unha das organizacións, desde as máis fortes ata as máis débiles”. Tamén apuntou a necesidade de colaboración entre todos os responsables de rexión co obxectivo de pór en alza o valor traballo como elemento fundamental de futuro e que, xunto coa responsabilidade social, conforman as características esenciais das cooperativas de traballo.

Igualmente, destacou a grande importancia que ten nestes momentos o emprego, xa que é un ben escaso en todas as sociedades. Por todo isto, resulta prioritario que as cooperativas de traballo visibilicen a súa forma de facer empresa, con métodos democráticos, participativos e xeradores de cohesión social e territorial.

Unha película para apuntar

Novembro 22, 2011 in cooperativismo

Dentro do 26 Festival Internacional de Cine de Mar del Plata presentouse unha proxección moi especial á que asistiron centos de obreiros de Fábricas Recuperadas de toda a Arxentina. Acudiron á estrea da película Industria Argentina do director Ricardo Díaz Iacoponi.

Industria Argentina. La fábrica es para el que la trabaja aborda unha historia ambientada na crise económica e na quebra de multitude de empresas. En ALURMAR, unha fábrica metalúrxica, os traballadores resístense a perder o seu único medio de vida.

Pouco a pouco, tomando o control da súa desesperación, os traballadores comezan a organizarse como unha cooperativa para manter en funcionamento a compañía abandonada polos donos. O protagonista, Juan, di: “O valor da fábrica non é só o edificio e as máquinas. Unha fábrica tamén son os traballadores e só eles poden facela funcionar.” E o seu compañeiro Daniel segue: “Temos o coñecemento, a experiencia e o acceso ás maquinas”.

En Arxentina, o Movemento de Fábricas Recuperadas polos Traballadores conseguiu salvar da quebra máis de 250 plantas que agora proporcionan un medio de vida para máis de 2 mil obreiros.

 Imaxe destacada: Ilco

Cantas cooperativas existen en Galicia?

Novembro 18, 2011 in cooperativismo

En 2010 existían en Galicia 872 cooperativas, segundo datos do Informe anual da Economía Social Española 2010-2011 elaborado por CEPES. Isto supón que o cooperativismo galego representa un  3,85% do total do conxunto do Estado. Galicia é a novena comunidade autónoma en número de cooperativas.

A vitalidade do cooperativismo podemos medila tamén no número de persoas ocupadas en empresas de Economía Social: nese mesmo ano, 2010, traballaban nas cooperativas galegas 8243 persoas.

Entre os anos 2004 e 2009 creáronse en Galicia 236 novas cooperativas, o que supón unha media de 40 cooperativas por ano, segundo datos do Observatorio español da Economía Social. Estas 236 cooperativas comezaron cun total de 5523 persoas socias, o que supón unha media de 920 novas cooperativistas por ano. Das 40 cooperativas creadas en 2009, 17 foron de traballo asociado, 2 de consumo e usuarios, 4 de vivenda, 8 agrarias e 5 de transporte. Estas cifras ofrecen un balance positivo xa que mostran que o cooperativismo é unha alternativa eficaz para o fomento de iniciativas empresariais, do autoemprego e das asociacións produtivas e de consumo.

Non obstante, para coñecer mellor o estado do cooperativismo galego podes consultar o Informe de Síntese do Cooperativismo Galego de 2007. A pesar de ser o informe máis actualizado que existe aplicado só ao ámbito galego, temos que ter en conta que a realidade económica mudou nos últimos anos de maneira importante, especialmente desde o inicio da crise económica, feito que tamén influíu no cooperativismo.

Porén, cómpre lembrar os datos alentadores que se achegaron no artigo “As cooperativas resisten mellor a crise”  publicado neste blogue e que, en liñas xerais, apunta a un comportamento positivo das cooperativas fronte á crise.

Imaxe: tanya_b

Encontros xerenciais para cooperativas

Novembro 16, 2011 in cooperativismo, Formación, Uncategorized

A Unión de Cooperativas de Traballo Asociado Ugacota vai celebrar un encontro de carácter práctico que tratará sobre os procesos de negociación coas entidades financeiras:

Encontros xerenciais para cooperativas
A negociación con entidades financeiras

Pazo da Cultura de Pontevedra, martes 22 de novembro de 2011

Como podemos preparar e favorecer a negociación? É posible mellorar o acceso ao financiamento? Esta información é, sen dúbida, estratéxica para a xerencia e na xestión empresarial das cooperativas.Ugacota

Neses encontros, poderemos coñecer as claves para negociar e relacionarnos con máis capacidade e solvencia coas entidades financeiras; analizaremos como pór en valor os indicadores específicos do cooperativismo e como mellorar a presentación da información relevante sobre a cooperativa para que interpreten e valoren mellor o modelo cooperativo.

En resumo, nestas xornadas poderemos acadar unha aprendizaxe que reforce o noso posicionamento no acceso ás finanzas.

A inscrición é gratuíta mais o prazo remata o día 17 no correo nuria@ugacota.org ou no 986 13 65 92. Podedes consultar o programa das xornadas: Programa Negociación Entidades Financeiras_22 Nov

A imaxe destacada que encabeza o artigo é propiedade de Patmfitz.

Creative Commons License http://coopmunicando.info is licensed by coopMunicando under a Creative Commons Attribution-Noncommercial-Share Alike 3.0 United States License.