Slideshow shadow

Profit asesores, cooperativa de nova creación

PROFIT ASESORES é unha cooperativa de traballo asociado de nova creación nacida en 2011 e localizada en Vigo. Para coñecer este novo proxecto falamos con Rosana Fernández, unha das catro socias que conforman a cooperativa.

1. Cando e como nace o voso proxecto cooperativo?

En tempos de crise estabamos pensando nunha iniciativa emprendedora para desenvolver a nosa actividade e criamos que a fórmula da cooperativa era a que mellor se axustaba ás nosas necesidades.

2. A que vos dedicades?

Os nosos servizos son o asesoramento empresarial en contabilidade, fiscal e laboral tanto para empresas como para autónomos.

3. Cales son a filosofía e os valores da cooperativa?

A nosa filosofía é darlle un servizo proactivo aos clientes, ser un máis do seu cadro de persoal e involucrarnos activamente na toma de decisións do órgano de administración. Os valores son a responsabilidade, a proactividade, a formación continua e a atención particularizada.

4. Que proxectos tedes para o futuro?

O proxecto é consolidar o negocio nesta época de crise para, nun futuro, estar en condicións de crecer.

Podedes atopar a Profit Asesores no número 14 de Marqués de Valladares, en Vigo. Moita sorte!

Encontro sobre Seguros éticos

A federación de cooperativas SINERXIA organiza un Encontro sobre seguros éticos na economía social e solidaria en Galiza, que terá lugar o sábado 26 de maio en Compostela.

O acto decorrerá entre as 10.15 e as 13.45 h no Centro Sociocultural A Trisca (no barrio de San Pedro) e nel preténdese, por unha parte, presentar as características deste produto e, por outra, reflexionar sobre as posibilidades de creación de seguros éticos entre todas as entidades e persoas que conforman o mercado social galego.

No encontro contarase coa presenza da cooperativa catalá de servizos para a economía social ARÇ a cal explicará o papel que o desenvolvemento deste produto pode xogar na construción e afortalamento do mercado social. Para ampliar información sobre esta actividade recomendámosvos que descarguedes o Programa aquí anexo. Nel tamén se explica o procedemento de inscrición.

Xesforesta, un novo proxecto cooperativo

Iniciamos esta quenda de entrevistas ás cooperativas de recente creación coñecendo a Xesforesta S. Coop. Galega, un novo proxecto no ámbito da enxeñaría forestal e ambiental ao que lle desexamos moita sorte neste camiño que inicia.

1.  Cando e como nace o voso proxecto empresarial?

Aínda que a cada un de nós, por separado, xa nos roldaba a idea do autoemprego pola cabeza, foi en novembro de 2011 cando decidimos poñer en común este proxecto empresarial.

Todos/as nós temos a certeza de que a nosa comunidade autónoma ten moito potencial forestal e ambiental e cremos que existe outro xeito de xestionar os recursos; de forma responsable e involucrando a poboación na toma de decisións.

2. A que vos dedicades?

De xeito simplificado, podemos dividir os nosos servizos en tres bloques: enxeñaría forestal, enxeñaría ambiental e formación nestes eidos. Máis polo miúdo:

Enxeñaría forestal: proxectos de silvicultura, repoboacións e infraestruturas; trámites e xestións; defensa da propiedade (deslindes, amolloamentos, correccións e estudos catastrais, valoracións); xestión integral de comunidades de montes veciñais en man común; control de calidade.

Enxeñaría ambiental: silvicultura preventiva; restauración hidrolóxico-forestal; plans de defensa contra incendios forestais; estudos de impacto ambiental; elaboración de programas de manexo de áreas naturais protexidas; aproveitamentos do monte (landras, cogomelos, biomasa, silvopastoreo, plantas aromáticas e medicinais…).

Actividades de formación: interpretación ambiental-patrimonio; elaboración de publicacións; edición de material divulgativo; formación e sensibilización ambiental.

3. Cantas persoas conforman a cooperativa?

As tres persoas socias traballadoras son: Carolina García López, enxeñeira técnica forestal; David Chapela Rodríguez, enxeñeiro de montes; e Anxos Riveiro Olveira, técnica en xestión e organización dos recursos naturais e paisaxísticos e técnica en produción acuícola.

4. Cales son a filosofía e os valores da vosa cooperativa?

A nosa filosofía consiste en contribuír ao benestar social das comarcas de Muros, Noia, Barbanza e o Sar, coa premisa máxima da mellora continua da xestión forestal sostible e da multifuncionalidade para acadar un status organizativo e especializado en servizos forestais, ambientais e formativos no ámbito galego.

Os nosos valores baséanse na eficacia, a través dun equipo profesional capacitado para dar respostas de calidade aos servizos; no compromiso coa xestión forestal sostible, a multifuncionalidade e a mellora continua dos servizos; na conduta social e responsable coidando o benestar con vista ao futuro das xeracións vindeiras; na innovación continua dos modelos de xestión e implicación coas novidades do sector forestal; e no desenvolvemento local e arraigamento social, promovendo os produtos, usos e costumes da nosa contorna de traballo.

5. Cal é a vosa relación coa contorna local?

Malia que acabamos de comezar a nosa andaina como cooperativa e á falta de elaborar o Plan de responsabilidade social empresarial, non é algo novo para nós o de contribuír dalgún xeito a mellorar a nosa contorna. De feito participamos dende hai uns anos de forma activa e altruísta na comunidade de montes da parroquia onde temos o domicilio social da cooperativa. Ademais de estar inmersos noutras asociacións de diferente índole.

6. Que proxectos tedes para o futuro?

Queremos chegar a ser unha cooperativa de referencia no sector forestal e medioambiental de Galicia, poñendo en práctica proxectos de innovación para unha xestión responsable, dinamizando as comunidades de montes veciñais en man común e sendo unha fonte formativa e informativa para todos os axentes involucrados no medio rural.

 

A economía social, obxecto de estudo e investigación

Abril 19, 2012 in cooperativismo, Economía social, Uncategorized

A importancia e magnitude da economía social e o cooperativismo no Estado converteu esta temática nun obxecto de estudo e investigación tanto para o mundo universitario como para diferentes entidades e centros de estudo especializados.

No Estado español existe unha mesta rede de revistas, organismos, arquivos, institutos universitarios, observatorios, etc. que centran a súa actividade no estudo, análise e investigación sobre a economía social e o cooperativismo. Ademais, en moitas universidades españolas, a economía social ten unha presenza cada vez maior nos estudos de terceiro ciclo e posgrao. Con estas liñas iniciamos unha pequena serie de artigos nos que imos presentar as distintas iniciativas de estudo e investigación da economía social e cooperativismo.

Entre as diferentes entidades que se dedican ao estudo do cooperativismo no Estado, debemos destacar, en primeiro lugar, os observatorios da economía social. En España, operan actualmente dous observatorios; en primeiro lugar temos o Observatorio Español da Economía Social (OEES). Segundo o propio OEES, os seus obxectivos focalízanse “na captación de datos dispersos, sistematización e difusión destes no contorno, avaliación das políticas públicas e impacto da economía social na solución de problemas económicos e de significación social”.

O Observatorio realiza un seguimento constante, entre outros, dos seguintes indicadores:

  • Datos económico-financeiros das empresas e entidades da economía social.
  • Datos socio-laborais, de inserción de discapacitados e persoas desfavorecidas, de igualdade entre homes e mulleres, de incorporación da mocidade ao mercado de traballo e outros.
  • Outros datos macro e microeconómicos.

Cuns obxectivos similares naceu o Observatorio Iberoamericano del Empleo y la Economía Social y Cooperativa, OIBESCOOP; creouse no seo do Instituto Universitario de Economía Social e Cooperativa IUDESCOOP da Universitat de València e coa colaboración de CIRIEC España e a Fundación Iberoamericana de Economía Social (FUNDIBES).

Un 17 de abril para o espírito da Economía Social

Abril 17, 2012 in cooperativismo, Economía social, Formación

Hoxe, 17 de abril, celébrase unha xornada de sensibilización sobre o fomento do espírito emprendedor da economía social desde a universidade estatal. A xornada está organizada conxuntamente pola Confederación Empresarial Española de la Economía Social (CEPES) e a Conferencia de Reitores das Universidades Españolas (CRUE).

No marco desta xornada, CEPES e CRUE asinarán un convenio para o fomento desde as universidades estatais do emprendemento en economía social. Con este acordo, preténdese que as universidades, como axentes innovadores e motor do crecemento económico do seu contorno social, impulsen a cultura e o espírito emprendedor da economía social, mediante o desenvolvemento de investigacións e a xeración de actividades ligadas ao emprendemento.

Os Bolechas van á cooperativa

Abril 17, 2012 in Consumo responsable, cooperativismo, Economía social

Os Bolechas van a Panxea

Aínda que non é unha nova recente, merece un espazo no noso blogue o libro-cómic Os Bolechas van á cooperativa de Pepe Carreiro. Como xa saberedes, Pepe Carreiro é o autor e creador dos Bolechas,  a serie de contos infantís posiblemente de maior éxito entre pequenos e pequenas.

O libro Os Bolechas van á cooperativa realizouse en colaboración con Panxea con ocasión do seu XVI aniversario. Como xa vos comentamos nalgún outro artigo, Panxea é unha cooperativa de consumo sen ánimo de lucro, que ten por obxectivo principal difundir e promover o Comercio Xusto así como a agricultura ecolóxica en Galicia.

Para adquirilo, podedes ir a Panxea, na Rúa da Rosa 36, en Santiago. Mais, se estades en Vigo ou en Lugo tamén está dispoñible en Árbore e na Cova da Terra, respectivamente.

 

Cartel gañador para o Ano Internacional do Cooperativismo

Abril 16, 2012 in cooperativismo, Uncategorized

Hoxe imos mostrarvos un fermoso traballo realizado pola cooperativa valenciana Collage-no. Este proxecto gañou o 1º Premio do concurso de carteis do Ano Internacional das Cooperativas, outorgado pola Alianza Cooperativa Internacional.

Ao concurso presentáronse cooperativas de deseño e creación gráfica de todo o mundo con proxectos que expresaran os valores do movemento cooperativo no Ano Internacional.

collage-no

Cartel gañador

O deseño gañador de Collage-no non só mostra as virtudes cooperativas; tamén foi producido de forma cooperativa; cada artista deseñou unha sección diferente, utilizando diferentes técnicas nun anaco de papel dobrado en tres, sen poder ver o que a outra persoa creara. Ninguén sabía que aspecto global tería a proposta ata que se  despregou totalmente.

Esta proposta de ensamblaxe colectiva de imaxes baseouse nunha técnica chamada “cadáver exquisito”. Cada deseñador de Collage-no ilustrou un dos tres conceptos, elixindo libremente a técnica e os recursos dispoñibles: empresa, sustentabilidade e cooperación.

Podedes descargalo na páxina: 2012.coop

 

A web de COCETA para o Ano Internacional do cooperativismo

Marzo 20, 2012 in cooperativismo, Uncategorized

COCETA (a Confederación Española de Cooperativas de Traballo Asociado) acaba de poñer en marcha unha web das cooperativas de traballo con motivo do Ano Internacional do Cooperativismo das Nacións Unidas, 2012: www.spain2012.coop.

Como xa anunciamos hai uns meses, 2012 é un ano para celebrar o cooperativismo. Co fío da mensaxe do Ano Internacional do Cooperativismo das Nacións Unidas, “As empresas cooperativas axudan a construír un mundo mellor” estanse a desenvolver actividades de promoción, difusión e celebración do movemento cooperativo en todo o mundo.

Pois ben, todas estas actividades e eventos que se están a desenvolver tanto no ámbito estatal como en todo o mundo pódense ver na web desenvolvida por COCETA.

Nesta páxina podedes acceder aos sitios web temáticos e autonómicos sobre o Ano Internacional das Cooperativas 2012 e consultar unha visión xeral dos beneficios do cooperativismo para a sociedade. Na páxina inicial, podedes empregar a axenda para compartir con todo o mundo os eventos e actividades do cooperativismo no ano 2012. Ademais, está dispoñible unha serie de vídeos sobre cooperativismo e xogos interactivos para entreterse e, á vez aprender sobre o traballo en cooperativas.

Creative Commons License A web de COCETA para o Ano Internacional do cooperativismo is licensed by coopMunicando under a Creative Commons Attribution-Noncommercial-Share Alike 3.0 United States License.