Slideshow shadow

Unha banca ética cooperativa internacional

O cooperativismo en xeral e as finanzas éticas en particular están de parabéns. En 2013 asistiremos ao nacemento dunha banca ética cooperativa de carácter internacional resultado da fusión de Fiare e da italiana Banca Popolare Etica.

A decisión foi tomada esta fin de semana nunha asemblea celebrada na localidade madrileña de Ribas-Vaciamadrid. A integración destes dous proxectos de finanzas éticas implica a unión dos seus respectivos capitais sociais e das súas bases sociais e operativas. Isto dará como resultado unha banca ética internacional común entre Italia e o Estado español.

En marzo de 2012, BPE contaba con 36.898 persoas asociadas e 37,6 millóns de euros de capital social, mentres que Fiare contaba con 2.879 persoas socias e 3,2 millóns de euros de capital social.

Mediante este acordo, FIARE convértese en axente exclusivo de Banca Popolare Etica, unha cooperativa de crédito que opera en Italia como banco e ofrece todo tipo de produtos e servizos baseándose nos principios de ausencia de lucro, democracia cooperativa e construción desde a base.

Por que non traballamos en equipo?

O traballo en equipo e a xeración de sinerxías son o cerne da xestión cooperativa. Aproveitar as potencialidades para tirar o máximo proveito das achegas das persoas e diminuír as dificultades son o obxectivo dun obradoiro gratuíto que organiza a Unión de Cooperativas de Traballo Asociado Ugacota.

Esta acción formativa insírese no marco da Rede Eusumo e celebrarase de forma presencial en Vigo, no Centro da Rede Eusumo na Cámara de Comercio de Vigo, (Rúa República Arxentina 18 A Vigo), cunha actividade específica dirixida ao público en xeral, tanto persoas en activo (prioridade a socias e asalariadas de cooperativas) como a persoas en desemprego.

O obradoiro constará de 25 horas de duración, do 11 ata o 15 de xuño, en horario de 10.00 a 15:00 horas. Traballaremos coas habilidades persoais e sociais clave para traballar nun entorno colaborativo.

Podes consultar o programa polo miúdo na Ficha que anexamos. Para obter máis información ou efectuar a inscrición, podes dirixirte ao correo nuria@ugacota.coop o ao teléfono 986 13 65 92.

27113 Comuna

Desta vez, imos coñecer a 27113 Comuna, un proxecto cooperativo innovador e, ao mesmo tempo, profundamente vinculado coa revitalización do rural.

1. Cando e como nace o voso proxecto cooperativo?

27113 Comuna, S. Coop constitúese en febreiro do 2011 en Cancio, no Concello de Negueira de Muñiz. Este concello é o menos poboado de Galiza, pertence á Rede Natura 2000 e está situado na Reserva da Biosfera Eo, Oscos e Terras de Burón, ao tempo que constitúe un dos principais núcleos de poboación de residentes neorrurais da Galiza. É por isto que o lugar garante as condicións mínimas para establecer as bases deste proxecto en concordancia co seu espírito e proporciona o impulso definitivo para iniciar o proxecto cooperativo.

Por outra parte, as socias teñen unha longa traxectoria en proxectos cooperativos e asociativos e coincidiran xa noutras ocasións. Este feito facilita a confianza mutua para levar a cabo o proxecto.

Os motivos para emprender o proxecto son: a necesidade de traballo estable remunerado e continuidade profesional; a necesidade de compaxinar e xuntar baixo un só proxecto o compromiso social, a vida no campo e o traballo remunerado.

2. A que vos dedicades?

Á xestión dun local multiservizos rural no que se desenvolven as seguintes actividades:

 1. Tenda ou comercio polo miúdo de produtos de alimentación e de fogar procedentes da agricultura ecolóxica e o comercio xusto e de produtos locais.

2. Servizo hostaleiro de restaurante (casa de comidas) con zona de barra-bar.

3. Servizo de Internet, información turística e venda de artesanía da zona.

4. Organización e realización de actividades de turismo cultural e rural, fomento do cooperativismo, formación para a vida no campo, educación medioambiental…

5. Xestión dunha aula da natureza e xardín forestal comestible e sensitivo con acceso a persoas discapacitadas.

3. Cantas persoas conforman a cooperativa?

Actualmente somos tres socias traballadoras. Neste verán incorporarase unha socia máis.

4. Cales son a filosofía e os valores da cooperativa?

O apoio mutuo, a autoxestión, a economía social e sostible, a responsabilidade, a profesionalización.

Os nosos obxectivos sociais son:

1. A mellora medioambiental, a través do fomento da agricultura ecolóxica, a silvicultura social e sostible e o coidado e protección do monte, da súa fauna e flora.

2. A protección dos animais e o fomento dos seus dereitos como seres que senten.

3. O fomento do consumo consciente, que se potenciará principalmente a través da política de compra-venda dos produtos que comercializará a cooperativa nas súas instalacións (tenda e bar-restaurante).

4. A integración de colectivos sociais con maiores dificultades, como minusválidas/os, persoas en risco de exclusión social, inmigrantes, paradas/os de longa duración… e a loita contra a pobreza e situacións de especial necesidade.

5. O fomento da economía social.

5. Cal é a vosa relación coa contorna local?

A historia recente de Negueira de Muñiz está marcada por dous acontecementos: a construción do encoro do Salime nos anos 60 e a creación da Comuna de Foxo no ano 1977. A Comuna de Foxo inspirou aos promotores para darlles nome a este proxecto cooperativo.

Actualmente, o colectivo rural é moito menos numeroso que entón, pero continúan no lugar moitas familias con fillos e ata netos. A poboación neorrural é moi nova de media e constitúe o colectivo máis novo do rural galego actualmente. A nosa cooperativa interactúa con este colectivo e co resto do rural achegando formación para a creación de cooperativas, fomentando e formando para o autoemprego en xeral, achegando servizos e xerando economía local a través da contratación de persoal e servizos e a través da compra dos produtos de horta, artesanía… para a tenda e o restaurante.

Actualmente, estase traballando co empresariado local para crear unha asociación de empresarios.

6. Que proxectos tedes para o futuro?

Temos varios proxectos futuros:

Consolidar as actividades actuais.

Crear novos postos de traballo relacionados coa xestión e a formación medioambiental.

Crear novos espazos de xardín forestal e produción ecolóxica.

Investigar e fomentar usos sostibles do monte distintos dos madeireiros.

Ampliar os servizos para persoas discapacitadas, enfermas ou na última fase da vida.

Como vedes, é un fermoso proxecto para o que desexamos longa e intensa vida!

 

O cooperativismo avanza en Galicia a pesar da crise

Maio 8, 2012 in cooperativismo, destacadas, Informes, Uncategorized

O Plan Estratéxico para Cooperativas elaborado pola Consellería de Traballo e Benestar foi aprobado en 2008. Entre os obxectivos máis importantes destacaba o impulso á creación de novas cooperativas e o incremento do número de persoas asociadas. Neste sentido, en 2011 creáronse 48 novas cooperativas mentres que o número de novas persoas asociadas aproximouse a 1400. Esta última cifra duplica a cifra acadada en 2009 e mantén o número rexistrado en 2010.

Neste momento, existen actualmente en Galicia 1150 cooperativas, as cales sosteñen por volta duns 20.000 empregos na comunidade autónoma. Desde 2009, e a pesar da crise, o número de cooperativas e persoas asociadas continua a medrar considerablemente.

Desde este blogue queremos facer a nosa pequena achega para difundir os novos proxectos cooperativos xurdidos nos últimos tempos. Por iso, na próxima publicación iniciaremos unha serie de entrevistas para dar a coñecer as cooperativas de creación recente.

E, por suposto, desexámoslles moita sorte a todos os novos proxectos cooperativos que veñen enriquecer o noso tecido social e laboral!

FAQ en COCETA

Maio 3, 2012 in cooperativismo, Uncategorized

Desde a páxina web de COCETA veñen de lanzar un FAQ (Frequently asked questions) sobre a nova normativa contable para as cooperativas. A través deste FAQ podedes, dunha maneira rápida e sinxela, expoñer todas as preguntas e dúbidas que teñades ao respecto.

Pódese acceder ao FAQ na sección e consultar as dúbidas que xa se formularon alí mais tamén é posible presentar as cuestións enviando un correo directamente: info@coceta.coop.

Xornada Técnica sobre a Lei de Cooperativas

Abril 26, 2012 in cooperativismo, Formación, Lexislación

A Dirección Xeral de Relacións Laborais, en colaboración coas entidades representativas do cooperativismo galego, organiza unha xornada de carácter técnico sobre a modificación da Lei de cooperativas de Galicia e a súa adaptación ao novo marco legal.

Enmarcada nos actos de celebración do Ano Internacional do Cooperativismo, a xornada afondará nas modificacións operadas pola nova Lei de cooperativas de Galicia (Lei 14/2011), especialmente no que atinxe á aplicación da nova normativa contable ás cooperativas e todos os cambios que implica.

A xornada será impartida por expertos no ámbito contable e xurídico e celebrarase o próximo mércores 2 de maio a partir das 9:30 horas no Salón de Actos da Escola Galega de Administración Pública (EGAP).

Para coñecer o programa completo das xornadas, podedes descargar e consultar o tríptico das xornadas.

A inscrición é gratuíta e poderá efectuarse a través dos seguintes medios:

Nornas Hostel: un novo proxecto cooperativo

Abril 26, 2012 in cooperativismo, Nova cooperativa

O pasado venres 20 de abril celebrouse a festa de inauguración da cooperativa NORNAS HOSTEL, un albergue internacional localizado á beira do Miño no Concello de Gondomar. Trátase dun proxecto innovador de turismo sustentable e integrado no contorno local, orientado á oferta de servizos de aloxamento e lecer para turistas.

Ademais do aloxamento, o novo establecemento ofrece unha serie de servizos adicionais como wifi, cociña de uso libre, servizo de lavandaría, leira con horta ecolóxica, etc. Tamén organizan actividades socioculturais e formativas que permiten que as persoas aloxadas entren en contacto con proxectos e persoas do contorno.

Para coñecer mellor os servizos que NORNAS HOSTEL ofrece así como as actividades que promoven recomendámosvos que entredes na súa páxina web.

Ademais, podedes ampliar a información sobre o proxecto na reportaxe que lles fixeron esta fin de semana no Faro de Vigo.

Desde este blogue desexámoslles moita sorte ás persoas que forman parte deste novo proxecto cooperativo!!

Premios á Cooperación 2012

Abril 20, 2012 in cooperativismo, Uncategorized

O Consello Galego de Cooperativas vén de  convocar os “Premios á Cooperación 2012”. Podedes presentarvos baixo as seguintes modalidades:

  • Premio aos valores cooperativos. Destínanse á cooperativa, entidade ou persoa que máis teña destacado no impulso dos valores cooperativos en Galicia.
  • Premio ao mellor proxecto cooperativo. Outórgase a un proxecto empresarial cooperativo de especial relevancia. Terase en conta o seu carácter innovador, a intercooperación e a repercusión no contorno, entre outros valores.
  • Premio á promoción do cooperativismo. Diríxense á persoa ou entidade que destacara especialmente no fomento do cooperativismo, tanto pola súa traxectoria como por actuacións de carácter puntual.

Cada premio ten unha dotación de 6.000,00 € e a entrega de premios farase o Día do Cooperativismo, o primeiro sábado do mes de xullo.

O prazo de presentación de solicitudes remata o 16 de maio de 2012. Podedes consultar as bases para o ano 2012 no DOG de 16 de abril.

Creative Commons License Premios á Cooperación 2012 is licensed by coopMunicando under a Creative Commons Attribution-Noncommercial-Share Alike 3.0 United States License.