Slideshow shadow

Curso sobre cooperativismo

O próximo 28 de febreiro comeza un Curso de Formación en Cooperativismo para Estudantes e Titulados Universitarios. Este curso gratuíto enmárcase nun convenio de colaboración entre a Consellería de Traballo e Benestar da Xunta de Galicia, a Universidade de Santiago de Compostela e as asociacións de cooperativas: Agaca, Ugacota e Sinerxia.

Rematará o 25 de marzo e durará 42 h, distribuídas entre 19 h presenciais, 8 h de prácticas e 8 h de visitas e análise de experiencias reais.

A inscrición está aberta ata o 23 de febreiro de 2012 pero convén facelo canto antes xa que a admisión terá en conta, ademais do expediente académico, a orde de chegada. O número máximo de prazas será de 36 alumnos e alumnas.

Ao rematar o curso, realizarase a convocatoria pública de 3 contratos laborais dun ano de duración para a formación como técnicos no asesoramento e xestión de proxectos cooperativos. A asistencia con aproveitamento ao curso contará como mérito relevante no concurso.

Podedes ampliar a información na ficha descargable sobre o curso.

Imaxe destacada: Srbichara

Mulleres e cooperativismo

A finais do pasado ano, editouse o número 13 da publicación anual, Mujeres y cooperativismo, promovida por COCETA (Confederación Española de Cooperativas de Traballo Asociado).

Este número edítase nun momento social moi difícil: os últimos datos da Enquisa de Poboación Activa (EPA) do Instituto Nacional de Estatística indican que a taxa de paro feminino subiu en 282.200 mulleres. Neste momento, a taxa de paro feminina está no 23,32% mentres que a masculina é do 22,46.

Alén destes datos tan dramáticos, outros estudos advirten que as mulleres perciben un salario inferior ao dos homes polo mesmo traballo e que sofren as consecuencias da dobre ou tripla xornada laboral, produto da falta de políticas de conciliación laboral, familiar e persoal.

Neste contexto, CuadernosMujer13 analiza a través dun amplo abano de artigos, noticias e experiencias, a realidade específica da muller e destaca os valores que a figura empresarial da cooperativa de traballo representa para o seu desenvolvemento persoal e laboral. A cooperativa de traballo axuda a diminuír a fenda de xénero nas empresas.

Entre estas contribucións, destaca a presenza da Unión Galega de Cooperativas de Traballo UGACOTA, colaborando co artigo “Formando a mulleres para crear cooperativas e acceder a cargos directivos” onde se describen as actuacións que realiza para promover o papel da muller nas cooperativas e formar mulleres emprendedoras no cooperativismo.

Xornadas informativa sobre as axudas ao cooperativismo

Como xa comentamos a semana pasada, acaba de publicarse a convocatoria de axudas relacionadas coas actividades de promoción e fomento do cooperativismo, fomento e consolidación das asociacións de cooperativas e de sociedades laborais, e programas de fomento do emprego en empresas de economía social e de promoción do cooperativismo.

En relación con isto, a Consellería de Traballo e Benestar convoca para o día 9 de febreiro do 2012, unha xornada informativa sobre estas axudas na sede da Escola Galega de Administración Pública (EGAP) en Santiago de Compostela, na Rúa de Madrid, 2-4. A xornada comezará ás 10:30 horas.

Para inscribirse, é preciso contactar no enderezo electrónico redeeusumo.ctb@xunta.es ou no teléfono 981 534 601, ata o día 6 de febreiro.

Na xornada tamén se fará unha breve exposición dos proxectos REDE EUSUMO e o proxecto COOPERA+.

Imaxe destacada: Prof

 

Seminario sobre a contabilidade nas cooperativas

Novembro 14, 2011 in cooperativismo, Formación

O próximos días 15 e 16 de novembro vaise desenvolver un “Seminario sobre a Contabilidade nas Sociedades Cooperativas” organizado polo Centro de Estudos Cooperativos da USC e a Dirección Xeral de Relacións Laborais da Xunta de Galicia e coa colaboración do Consello Galego de Cooperativas. A inscrición é gratuíta e pode facerse no correo cecoop@usc.es.

cubes

Imaxe: v_g

As charlas terán lugar no salón de graos de Ciencias Económicas e Empresariais e abordarán, entre outros temas, as normas contables das cooperativas, o panorama do cooperativismo galego a partir da información contable, as contas satélites da Economía Social, etc.

Podedes consultar o programa completo das xornadas: Seminario sobre a contabilidade nas sociedades cooperativas

2012 Ano Internacional das Cooperativas

Novembro 11, 2011 in cooperativismo

O pasado 31 de outubro, as Nacións Unidas presentaron o Ano Internacional das Cooperativas nun acto celebrado en Nova York. O lema escollido para este ano é As cooperativas constrúen un mundo mellor.

Ao acto asistiron máis de 150 representantes das cooperativas máis grandes do mundo (entre elas, a Corporación Mondragón) para, conxuntamente, analizar as posibilidades de estender o crecemento das empresas cooperativas nos próximos anos.

Tras unha mesa redonda sobre a contribución das cooperativas ao desenvolvemento sustentable, desenvolveuse a cerimonia oficial de apertura na que o secretario xeral das Nacións Unidas, o presidente da Asemblea Xeral e a presidenta da Alianza Cooperativa Internacional, entre outros, lanzaron o Ano Internacional das Cooperativas.

No acto tamén se presentou un vídeo producido pola Organización Internacional do Traballo (OIT) para celebrar a data:

As cooperativas resisten mellor a crise

Novembro 7, 2011 in cooperativismo, Informes

Un informe de ámbito internacional elaborado por CICOPA vén de poñer de manifesto unha vez máis que as cooperativas resisten mellor a crise en termos de emprego e sustentabilidade empresarial. 

En grandes liñas e con carácter xeral, o informe afirma que a situación económica global das cooperativas (no que atinxe ás vendas e á produción), despois dun período de estancamento, semella iniciar novos vieiros de recuperación.

pages and books

Imaxe: Forwardcom

 

Por outra parte, en países de forte implantación cooperativa (Italia, España, Francia) a perda de emprego cooperativo ten un impacto máis feble en comparación coas empresas convencionais. Resulta especialmente importante o dato achegado por COCETA, segundo o cal no ano 2010 o emprego aumentou nun 0,2% entre as súas cooperativas de traballo asociado. Pode parecernos un aumento insignificante, pero trátase dun dato que debe ser lido á luz dos espectaculares datos de destrución de emprego nas empresas convencionais de moitos sectores económicos.

Ademais, o informe reflicto que o peche de cooperativas está máis estendido nos países de Europa Central e do Leste ao contrario do que acontece nos países de Europa Occidental de forte implantación cooperativa.

Un dos elementos desfavorables do informe radica no acceso aos recursos financeiros e nos problemas de débeda. O informe constata actitudes desfavorables dos bancos e das caixas e de condicións de acceso restritivas cando se solicitan créditos e préstamos. Neste sentido, as cooperativas mesmo terían máis dificultades que as empresas convencionais.

Podes consultar o informe completo no apartado “Destacados” da páxina do Observatorio Español da Economía Social.

I Xornadas de Economía e Desenvolvemento

Novembro 4, 2011 in Consumo responsable, Economía social, Formación

Os días 10 e 11 de novembro celebraranse as I Xornadas de Economía e Desenvolvemento, organizadas pola Universidade da Coruña e Fiare.

Nestas xornadas teremos a oportunidade de escoitar diferentes perspectivas sobre a Economía Social e mercados financeiros, consumo responsable, finanzas éticas, cultura libre, desenvolvemento norte-sur… que serán expostas por un amplo abano de persoas expertas. Entre outras convidadas, estará a Cooperativa de Consumo Zocamiñoca.

Terán lugar no Salón de graos da Facultade de Economía e Empresa (Campus de Elviña) da Universidade da Coruña. Podedes apuntarvos ata o 8 de novembro no correo ocv@udc.es.

Coop57 no I Encontro Social Galego

Novembro 3, 2011 in Economía social, Finanzas éticas, Formación

O próximo sábado, 5 de novembro, vaise celebrar o I Encontro Social Galego, promovido desde a Iniciativa Cidadá Ben Común. Neste encontro, foi convidada a participar a sección territorial de Coop57 co obxectivo de visibilizar as finanzas éticas e a economía solidaria.

Coop57 é unha cooperativa de servizos que destina os seus recursos propios a dar préstamos a proxectos de economía social que promovan a ocupación, fomenten o cooperativismo, o asociacionismo e a solidariedade en xeral. COOP57 iniciou a súa actividade en Cataluña en 1995. Posteriormente, a raíz do interese que espertou esta experiencia noutros territorios, creouse a sección COOP57, COOP57 Madrid,  COOP57 Andalucía e COOP57 Galiza (2009).

O I Encontro Social Galego desenvolverase sobre unha estrutura de debates sobre cinco eixes que debaterán en diferentes grupos de traballo; Coop57 estará no Eixe 2: Economía, facenda e cidadanía. Unha boa oportunidade para ampliar os nosos coñecementos sobre financiamento ético.

Creative Commons License http://coopmunicando.info is licensed by coopMunicando under a Creative Commons Attribution-Noncommercial-Share Alike 3.0 United States License.