Unha banca ética cooperativa internacional

Maio 29, 2012 in cooperativismo, destacadas, Economía social, Finanzas éticas

O cooperativismo en xeral e as finanzas éticas en particular están de parabéns. En 2013 asistiremos ao nacemento dunha banca ética cooperativa de carácter internacional resultado da fusión de Fiare e da italiana Banca Popolare Etica.

A decisión foi tomada esta fin de semana nunha asemblea celebrada na localidade madrileña de Ribas-Vaciamadrid. A integración destes dous proxectos de finanzas éticas implica a unión dos seus respectivos capitais sociais e das súas bases sociais e operativas. Isto dará como resultado unha banca ética internacional común entre Italia e o Estado español.

En marzo de 2012, BPE contaba con 36.898 persoas asociadas e 37,6 millóns de euros de capital social, mentres que Fiare contaba con 2.879 persoas socias e 3,2 millóns de euros de capital social.

Mediante este acordo, FIARE convértese en axente exclusivo de Banca Popolare Etica, unha cooperativa de crédito que opera en Italia como banco e ofrece todo tipo de produtos e servizos baseándose nos principios de ausencia de lucro, democracia cooperativa e construción desde a base.

Xornadas de Consumo Cooperativo

Decembro 20, 2011 in Consumo responsable, cooperativismo, Economía social, Finanzas éticas

A Cooperativa de Consumo Salgueiriños de Consumo está a realizar unhas Xornadas de Consumo Cooperativo desde o pasado mes de novembro até o próximo mes de marzo.

O pasado venres tivemos a oportunidade de asistir a unha mesa redonda: Cooperativismo de consumo. Obxectivos, realidades e experiencias en Galicia, con representantes das cooperativas de consumo Eirado, Panxea, Árbore e Salgueiriños de Consumo. Mais aínda quedan varias citas moi interesantes:

Venres, 20 de xaneiro. 20:00

Mesa Redonda: A Banca ética. Outro xeito de xestionar os nosos cartos. Con representantes de Coop57, Fiare Galiza e Triodos Bank. Tres opcións distintas de xestionar os nosos cartos fóra da banca tradicional: unha cooperativa de crédito, unha asociación e un banco ético

Venres 10 de febreiro. 20:00

Mesa redonda: Por un comercio xusto no Norte e no Sur con Amarante-Setem e Sindicato Labrego Galego. Un achegamento á realidade do comercio alimentario industrial e a conceptos como soberanía alimentar, comercio xusto, agroecoloxía…

Sábado, 10 de marzo. 18:00

Cine-Forum. “O pesadelo de Darwin”. Este documental aborda os efectos sociais e ambientais no Lago Vitoria de Tanzania provocados pela industria de pesca con destino ao mercado europeo.

Unha boa maneira de comezar o ano!

Imaxe destacada: Leocub

Reportaxe audiovisual de Coop57

Decembro 1, 2011 in cooperativismo, Economía social, Finanzas éticas, Uncategorized

O pasado mes de outubro, tivo lugar o Encontro 2011 de Coop57 en Cotxeres de Sants (Barcelona) para debater as liñas estratéxicas de futuro. Durante este encontro, a cooperativa Claraboia de produción audiovisual elaborou unha serie de reportaxes, unha por cada sección territorial, onde aparecen entrevistas a responsables e a cooperativistas que se beneficiaron dos servizos de Coop57.

Agora, Claraboia Cooperativa acaba de presentar estas reportaxes audiovisuais. A través das entrevistas que aparecen, podemos escoitar interesantes reflexións sobre os valores que representa Coop57 para a economía solidaria e sobre as oportunidades que ofrece como alternativa á banca tradicional.

Achegámosvos a reportaxe sobre a sección territorial galega mais tamén podedes visualizar as achegas das seccións territoriais de Andalucía, Aragón, Catalunya e Madrid.

 

Imaxe destacada: Ithil_luna

Coop57 no I Encontro Social Galego

Novembro 3, 2011 in Economía social, Finanzas éticas, Formación

O próximo sábado, 5 de novembro, vaise celebrar o I Encontro Social Galego, promovido desde a Iniciativa Cidadá Ben Común. Neste encontro, foi convidada a participar a sección territorial de Coop57 co obxectivo de visibilizar as finanzas éticas e a economía solidaria.

Coop57 é unha cooperativa de servizos que destina os seus recursos propios a dar préstamos a proxectos de economía social que promovan a ocupación, fomenten o cooperativismo, o asociacionismo e a solidariedade en xeral. COOP57 iniciou a súa actividade en Cataluña en 1995. Posteriormente, a raíz do interese que espertou esta experiencia noutros territorios, creouse a sección COOP57, COOP57 Madrid,  COOP57 Andalucía e COOP57 Galiza (2009).

O I Encontro Social Galego desenvolverase sobre unha estrutura de debates sobre cinco eixes que debaterán en diferentes grupos de traballo; Coop57 estará no Eixe 2: Economía, facenda e cidadanía. Unha boa oportunidade para ampliar os nosos coñecementos sobre financiamento ético.

Creative Commons License http://coopmunicando.info is licensed by coopMunicando under a Creative Commons Attribution-Noncommercial-Share Alike 3.0 United States License.